Николай Меркушкин: "Исторической лецтямось терди минек вейсэндявомс"

Саранск ошсо суббутасто Мордовиянь Прявтось вастовсь минек республикань Почетной граждантнэнь, Славань орденэнь кавалертнэнь, религиозной деятельтнень, строительной ды промышленной предприятиянь, Мордовиянь Общественной палатань ды общественной вейсэндявксонь представительтнень марто. Теде РИА «Инфо-РМ-нь» пачтясть республикань Прявтонть администрациянь пресс-службасто. Пурнавозтнень туртов Николай Меркушкин евтась лембе поздоровт.

 

«Минек масторсо ды республикасо ушодовсь пек эрявикс этап. Течи исторической лецтямось терди минек вейсэндявомс»,- тешкстызе сон.

 

Республикань Прявтось евтась покш сюкпря сетненень, кить кемекстасть эсь важодемасост экономиканть, культуранть, Мордовиянь од имидженть лангсо роботанть, кить лездасть беряньстэ эриця ломантнень туртов (социально незащищенных людей). 

 

Кода евтнесть пресс-службасо, мероприятиясонть макснесть казнеть ды почетной лемть. Истяжо евтасть покш сюкпря сетненень, кить роботыть экономикань ды социальной сферань эрьва кодат отраслятнесэ.

 

Сынст ютксо «Мордовгаз» акционерной обществань генеральной директорось Валерий Камолин, Владимир Ипатенко хирургось, минек республикань сырнень вайгельтне Сергей Плодухин ды Сергей Эскин, творческой коллективесь, кона Галина Лосевань прявт ало теизе народной оршамопелень коллекциянть, олимпийской чемпионось Алексей Мишин, параолимпийской налксемань чемпионось Равиль Бикмурзин, ламо эйкакш марто семиянь прявт ды ламо лиятат.