Республика Мордовиянь велень хозяйствань территория лангсо агрохимикатнэ ды пестицидтнэ ванстовить санитарной нормань колазь. Истямо вывод проверкань ютавтомань коряс тейсь минек республикань прокуратурась. Федеральной ды региональной законодательстванть мельга ваномань отделэнь прокурорось Зульфия Федякова тешкстызе, што сеетьстэ велень хозяйствань удобрениятне, агрохимикатнэ ды пестицидтнэ кирдевить берянь помещениясо. Истя, минек республикань Ковылкинской райононь велень хозяйствань вейке предприятия кирдсь 40 тоннат агрохимикат ушосо.

Проверканть коряс районной прокурортнэ сермадсть закононь коламонь витемань 67 представленият, конатнень коряс наказасть 18 должностной лицят. Панжозь административной ответственностень 62 уголовной тевть. Ваннозь тевтнень коряс административной ответственностес максозь 39 юридической ды должностной лицят. Судс сермадсть 2 заявленият, штобу тескень администрациясь ванстовлизе экологиянть ды кирдемс специальной башка таркасо касовксонь ванстомань а маштовикс химической средстватнень.

Кода пачтясть прокуратурасто, а маштовикс химической удобрениятнень урядызь Мордовиянь кото районсто: Покш Березникень, Покш Игнатовань, Темниковской, Теньгушевской, Торбеевской ды Чамзинской. 2007 иестэ минек республикасто ливтезь 202 ламо тоннат а маштовикс пестицидт ды агрохимикат (2006 иестэ- 60 тоннадо ламо). Штобу 2007 иестэ велень хозяйстватнестэ ливтемс отходтнэнь, республиканской бюджетстэ нолдасть 7 млн. 900 тыща целковойть.