Мордовиянь столицасо пецясто ютась пресс-конференция, кона алтазель спортивной якамонь коряс Гран-принь финалонь ютавтомантень. Теде пачти РИА «Инфо-РМ-нь» корреспондентэсь, кона ульнесь пресс-конференциясо. Конференциянть ветизь шожда атлетикань коряс Всероссийской федерациянь президентэсь ды Гран-принь директорось Татьяна Подорожная, спортивной якамонь коряс судьянь Международной комитетэнь председателесь Питер Марлоу, шожда атлетикань Всероссийской федерациянь президентэсь Валентин Балахничев, спортонь, физической культурань ды туризмань Мордовиянь министрась Владимир Киреев ды Норвегиянь, Австралиянь, Германиянь, Грециянь ды Белоруссиянь спортсментнэ, конатне ютазь пелькстамотнестэ пурнасть сехте ламо очкат. Пресс-конференциясонть кепедезель судействань коряс кевкстематне, башка кортазельть Мордовия столицань спортивной экипировкась ды Гран-прис спортсментнэнь анокчист. Спортивной якамонь коряс судьянь Международной комитетэнь председателесь Питер Марлоу тешкстынзе Мордовиянь спортивной якамос тонавтомань профессионализманть ды минек республикань спортивной зданиятнень ды оборудованиянть международной стандартост. Гран-принь ютавтомс Мордовия столицань анокчись пек тусь конференциянь участниктнень мелезэст. «Минь арсетяно, што 2011 иень спортивной якамонь коряс Европань чемпионатось истяжо ютавтови Саранскойсэ»,- мерсь Валентин Балахничев. Сонзэ валонзо кирдизь конференциянь меельце участниктнеяк. Пелькстамонь официальной панжомась карми течи, сентябрянь 28-це чистэ, 18 часто «Старт» стадионсо.