Республика Мордовиянь столицасо пецясто ютась республикань Правительствань заседания, кона алтазель уштома шкантень анокстамонтень. Минек республикань жилищно-коммунальной хозяйствань министрась Рашид Аширов пачтясь, што Мордовиясь сядо процентс анок телентень.

«Весе мероприятиятне ютавтозь 97-98%. Минь парсте анокстынек телень шкантень: улить материальной ресурст, аварийной запаст. Лиякс меремс, аноктанок сядо процентс»,- тешкстызе жилищно-коммунальной хозяйствань министрась.

Заседаниясонть истяжо тешкстазель, што минек республикась аламонь-аламо туи централизованной уштомадонть ве енов. Мордовиянь районтнэсэ ламот путнить кудосост уштомань башка системат. Ансяк минек столицантень лембечинть максыть ТЭЦэсь ды котельнойтне. Республика Мордовиянь Правительствань Председателесь Владимир Волков заседаниясо мерсь, што курок шкасто панжови уштомань сезонось.

«Миненек эряви шкастонзо нолдамс ошонь кудотнева лембенть. А течи-ванды Саранск ошсо ды районной центратнесэ ушодыть уштомо»,- мерсь Волков.