Сычковонь лемса Саранскяй художественнай училищати савсь кирьфтамс абитуриентонь кочкамать, сяс мес аш сонцень помещенияц. Кода азозе училищать директороц Людмила Шанина, тядде училищав поступась сембоц 19 ломань. Кафксотне синь эздост арасть "костюмонь моделированиясь" отделениянь студентокс, лядыксне примавсть "дизайн" отделенияв. "Кода афолеме ера, тейнек аш кода примамс сяда лама ломань, сяс мес аш коса работамс. Тяни минь ащетяма 30N ПТУ-ть зданияса, коса занцетяма сембоц вете класст", - азондсь Шанина. Тяка туфталть сюнеда художественнай училищань руководствати савсь мзярошка пингс селгомс кой-кона отделениятнень, тяка лувксса и живописень отделениять. "Минь арьсекшнеме панжемс художественно-театральнай и реставрационнай отделеният, конат кельговихть од ломаттненди. Но тяни, ужяленди, тейнек тянь аш кода тиемс", - поладозе Шанина. Саранскяй художественнай училищань зданиясь ухадсь 2004 кизоня. 30N ПТУ-сь арась ни колмоце вастокс, коса училищась сявсь помещения арендас.