Пожарнайть Александр Бояркинонь араламанкса, кона апалявсь Чамзинкса пожаронь матомста, эряви доноронь вер. Кода пачфнесы "Инфо-РМ" РИАсь, пожарсь Чамзинкаса лиссь 15 июльста. Толть матома кучфоль колма ломаньцта ащи дежурнай караулсь, конанди командиркс ульсь Александр Бояркин. Лисьфть няиензон валса, палы кудть вельхксонц лангса работась Бояркинонь ялгац 25 кизоса Александр Морозов. Толсь пцтай ни матовсь, мзярда Морозов апак учсек прась вельхксть пачк алу. Бояркинь комотсь ялганцты лездома. Прафть аф пяк курокста мумдонза меле Бояркин лихтезе сонь крфазь-крфай псиста, сонць тяка еткть апалявсь. Кафцьке кальдявста прянь маряйхне пачфтевсть центральнай районнай больницяв. Ужяленди, Александр Морозов, конань пицевсь теланц 80%, кулось. Александр Бояркин, конань теланц 35% ульсть III степенень пицевомат, пачфтьфоль Саранск ошень 4 N клиническяй больницянь пицевомань центрав. Тяни пожарнай подразделениятнень личнай составсна максси вер Александр Бояркинонди, но сон аф сатни зиянц повфть араламанкса. Сятненди, кинь ули мялец лездомс Александр Бояркинонди, можна максомс вер 8.00 частста сявомок 10-ти молемс ошень 4N больницяса, а 10.00 частста 12-ти веронь сявомань-каямань республиканскяй станцияса.