Мордовияста "Морденс" фолк-арт группась получась гран-при вокальнай асувонь "5 баллов" общенациональнай фестивальса-конкурсса, кона етась Геленджикса. Кода пачфнесы "Инфо-РМ" РИАсь, аф ваномок сянь лангс, што музыканттненди савсь пялькстомс 30-да лама коллектив мархта, "Морденс" группась лувфоль инь цебярькс "Ансамбль" номинацияса. Тяда башка, персональнай номинациятнень эса васенце васттнень занязь группань колма солисттне. Елена Алышева, Екатерина Кутаева и Роман Галишников азфтольхть конкурсонь инь цебярь вокальнай исполнителькс. "Морденс" группась няфтезень фестивальса мялень сембода салай творческяй номерхнень. Сон морсесь композицият колма стильса: национальнай, эстраднай и классическяй. Жюринь члеттне фкя мяльса лувозь "Морденсть" фестивалень мазептикс. Фестивальть итогонзон коряс, коллективсь тердевсь "Камва" этно-футуристическяй фестивальти, кона 4 августста 6-ти етай Пермьса. Участникокс тяса кармайхть улема Россиянь емла нароттнень 200-да лама представительсна. Фестивальса примайхть участия Удмуртияста, Карелияста, Марий Эл Республикаста, Ханты-Мансийскяй автономнай округста и Коми Республикаста творческяй коллектифне.