Мордовияса 14 июльста 16 июльти етафтф "Российскяй паксянь шись - 2006" выставкать-демонстрациять работаса примасть участия холдинговай 300 оцю предприятия. Тянь квалма "Инфо-РМ" РИАти пачфтсь "Российскяй паксянь шись- - 2006" выставкать-демонстрациять директороц Зоя Баутина. Сонь валсонза, выставкась-демонстрациясь келемфоль 100 гектаронь вастса. Экспозициять 60% занязе российскяй предприятиятнень продукциясна, лядыксть омба масторонь техникась. "Конешна, выставкать етафтыенза сяда оцю васта макссть эсь масторонь продукциянь ноляйти, мезсь водендаф Россияса экономикать уровененц кеподеманцты" отмечазе Баутина. "Эряви отмечас и сянь, што велень хозяйствань техникась няфневсь аф вастса ащезь, а тевса, мезсь сядонга шарфтозе лангозонза рамайхнень мяльснон", - китькстазе сон. Тядде выставкаса няфневсь аф аньцек велень хозяйствань техникась, но и оцю васта занясть эсонза животноводствась и селекциясь. Велень хозяйствань форумть участниконза ванозь агропромышленнай од культуратнень, тяка лувксса и корманди молихнень. Кода азозе Баутина, животноводствась няфневсь выставкаса васенцеда. Специалисттне ванозь-тиезь Росагролизингть политиканц пляманди жуватань рамамать коряс, и сяньге, кода етафневи эряфс тя программась Мордовияса.