7 июньцта Республикань Кудса етафтовсь селекторнай совешания. Эсонза ванфт кизефксне, конат сотфт республиканскяй бюджетть пяшкодеманц и агропромышленнай комплексса тефнень мархта. Мордовиянь Оцюнясь Николай Меркушкин башка отмечазе сянь, што муниципальнай образованиянь руководительхнень тячи пефтома оцюфт вииямань возможностьсна. Местнай потенциалть лац-ряц тевс нолямац кой-кона райоттнень эса максси ни няеви результатт. МР-нь финансонь министрсь Николай Петрушкин азозе, што алкоголень продукцияти акциснень коряс юмафксне лувондовихть кемотть миллион цалковайса. Няфни пря суррогатнай алкогольнай продукциянь салава мишендемась. «Но улихть тя кизефксть решандамаса и цебярь ширет. Тяфта, Кочкуровскяй райононь Вирьалдонь Тавла велеса нинге 2004 кизоня машфтозь самогононь пицемать. Суррогатть мишендеманкса путневсь штраф, и сон нефневсь муниципальнай образованиять бюджетса кода доходонь пялькс. 50 процентсь кочкаф суммать эзда етафневсь участковайть кирдемс»,-мярьгсь Петрушкин.